يا مولاي آه من غلبي
من النارو حرقت قلبي
يا مولاي بشكيلك شقاي وغلبي
حظي الديمة من ند الأنيس جافلبي
طالت السفره وأتحفّت مناسم تِلبي
هب الريم وعاودك الحنين يا قلبي
مالك نفسي مطعونة وتملّي تنيني
مالك عيني للغميد أبيتي تليني
عطشان ديمة كفح الموية ما برويني
كاتلاني الطريفيه البريدا قريني
الناس عيّدت مرقت على أصحابا
وأنا فريت على الجاهلة السمح ترحابا
فاطراً بيحكي برّاق البدودي سحابا
لفت قلبي زي لف طرحته اللافحابا
ختّت أيدا فوق إيدي إنجذبت خِدرتا
حبيت أمشي من كُتر الطرب ما قِدِرتا
بقت الحِنه بين إيدي وإيديها إندِرتا
لولا الحِنه بيني وبينها كنتا ودِرتا
** *** **
أخدر ليهو ضُل فوقو المحاسن شرّن
وأفلج فاطرو زي برق السواري إتكرّن
إتقسّم مقاطِع في المشي وإتحرّن
زي فرخ القطا الأماتو ركّن وفرّن
** *** **
إتمنى الدهب لو لونو يشبه لونِك
إشتهت الدُرر لو هي تبقى سنونك
مجنون ليلى حالتو أقلّ من مجنونِك
ما دام ليلى كانت في المحاسن دونِك
عن من أحبو أنا غير خاطري فُرِقتا
هايج بي غرام عن حالتي كُلي سُرِقتا
لولا أدمُعي من ناري كنت حِرقتا
ولولا ناري من كترت دموعي غِرقتا
غصبا عنى فارقت الضريح غير امرى
وكل ماهب نسام منو زاد فى جمرى
جرحى القرب يبرى كاد يودر عمرى
عودو لى تغريد بلبلك يا قمرى
عمي الهادي نشاب البريدا ضربني
قسم نومي من تيبان حيايا سلبني
حاكم الصافي ابقى يقبل سؤال صدمني
في صبري الكان جميل جربتو كلو غلبني
شعرك منظم زي السلاسل فتلو
وعينك ترقص الحجر ان بقت شافتلو
الطاوؤسة قاصدة مشيكي ما عرفتلو
واعصاب الراّك اتكهربت تلفتلو
ممشوق القوام الما وجدت مثيلو
جفاهو معاي ولا محنة غيرو
جافاني العزيز الكنت ديمة نصيرو
هو يسوي الغلط وانا اسوي كتر خيرو
النار في الدراويش البترجمو وجت
امواج المحبين بالشوارع قجت
وربات الخدور نزعت حجابا وعجت
المصدر: منتديات سودان ديجي للأغاني السودانية
الرئيسية