جرح الريد

جرح الريدة

سافر يا جرح جواي فوق جناح السرعة
الموج يوم يضارب الشاطئ
والريح لما تطفئ الشمعة
والمحبوب وقت يجرحني لو ضميرو يحس أو يوعا
جرح الريدة كان يتعد من ضمن العجائب السبعة

الضايق عقارب الريدة يرميهو الأثر بالخلعة
بنوت حواء ما لاتنو بالخوف والشجن واللوعة
بالليل والجراح نتاحة والناس ناموا بعد الهجعة
شفت بنات نعش في دمي يتهادن بهيات طلعة

يا قلبي الحزين اسمعني خت قرض الصبر في الوجعة
قول لي كيف تفيدك عترة وانت وقعت كم من وقعة
اتشهدت واستغفرت وغسّلت العليك بي دمعة
اتيقنت قلت براك ما ليك تب عشم في رجعة

مالك قلبي من تطراها بالبيك لا بتحس لا بتوعى
منحوس انت من ما قمت اصلك ما بتفوز بقرعة
سعدك لو تجيبو كرامة كان مديت زمان القرعة
في المر ما عليك ملامة أشرب ما تفضل جرعة

الناس قالوا لي انساها لو داير تطيب بسرعة
حاولت وغلبني انساها ذكراها صبحت لي طبعة
طلعتا في صباح ايامي لا غابت خميس لا جمعة
سرقت بالي ما فضل لي منو قدر اعد لسعبة

يا ست الحسان احلامنا ما بنلقاها عن ست ودعه
في دنيا الغرام والريدة البكا والنواح ما بدعة
زول كانت مشاعرو عليك جاري زي الحجر في الفلعة
محتار نارو كيف يطفيها مادام النفس بقى ولعة