عابرة ( عبر الدم )
محمد احمد الحبيّب
يا عابرة عبر الدم شايلك شرايني
أنا بي لقام مهتم بس كيف تلاقيني
لو عمري يتقدم وأضمن تلاقيني
أنا بعدو ما بندم لو مُتَّ في حيني
طيفك يزورني اشواق في النوم يناجيني
ويرحل بدون إشفاق ساعة يصحيني
يا طيف أكان مشتاق لي مين مخليني
طفل الغرام العاق ربيتو مابيني
يا عابرة دنيا الجن بي كل أعاصيرا
لو سعدي ما ممكن احسن لي من غيرا
أنا بي لقاك مؤمن لكني في حيره
يصعب لقاك كيفن والدنيا بي خيرا
أنا كنت شئ مجهول يا عابرة لولاكي
مع أني أول زول من بين ضحاياكي
فرشّتِي عمري الشاب اشعار من أملاكي
كانت على الاطلاق أجمل هدايكي
يا اماني لي بكرة والليلي والبارح
شايلك معاي ذكرى كان واعي كان سارح
بس يوم تبين سفرة يا عابرة بي الواضح
في نيتي من فكرة داير اجيك نازح
انا لو قدرت اجيك رؤياك من عيني
أكسير حياتي وشيك من حزني يشفيني
من إشتياقي اليك يا عابرة دسيني
ما بين رموش عينيك شيليني ختيني
كل البسيطة حسان يوم ما ملن عيني
غير عابرة مافي إنسان يهدمني يبنيني
آآآآآآآه يا جمال فتان قلَّب موازيني
لولا صفاء الايمان يفتني في ديني
مصباحك المسحور جاهرني عاميني
سايق خطاي مهبوش يسوقني و يوديني
ما عارف المقدور بالفرقة راجيني
خارج نطاق النور حايم حواليني
الرئيسية