منتدى تومكو

جمع قصائد
 
الرئيسيةالرئيسية  البوابةالبوابة  اليوميةاليومية  مكتبة الصورمكتبة الصور  س .و .جس .و .ج  بحـثبحـث  الأعضاءالأعضاء  المجموعاتالمجموعات  التسجيلالتسجيل  دخول  

شاطر | 
 

 البومات الحوت 4

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
تومكو



عدد المساهمات : 107
نقاط : 59821
تاريخ التسجيل : 24/10/2009
الموقع : الديوم الشرقية _ الخرطوم _ الشودان

مُساهمةموضوع: البومات الحوت 4   الأربعاء يوليو 14, 2010 6:40 pm

/ البوم شايل جراح
أنت كان زعلان

أنت كان زعلان أنا ما ما ما بزعل
أنت كان مبسوط يا حبيبنا نحنا بالأكتر ..

ده سؤالي نقروشو
ده حجيلي حركسو
لو سمعت كلام عدوك
احننا سيبناك للداروك

أنت كان زعلان .....
يا سيدي نحنا بالاكتر

نضوي البيت بالشمع
وليك كلاما بنسمع
كان جبل طلعو كان عسل داقو
لو سمعت كلام عدوك
احننا سيبناك للداروك
أنت كان زعلان .....


آسرني يا مياس

آسرني يا مياس
أحساس جميل زيك
ما لقيت في دنيا الناس
ساكت شبه زيك
آ سرني يا مياس ...

ما تشوفي يا نطرات
كيف القوام مياس
جمعت بيناتنا صلات
زاد الشعور أبعاد..

لا همس العيون ضرات
لا الريد يكون مياس

آسرني يا مياس ...

لما الكلام يتقال
في غناوي زي موال
يا شوق سنيني الطال
وشايلاك وشالت فال ..

خايفة السنين ترحل
ما أصلو العمر رحال ..

آسرني يا مياس ....



مع السراب

مع السراب وقت النزوح ..
مرسايا أتوهد ويروح
وأمشي في الريح في الريح .. ..
زي نجماً فوق ظلال الليل يلوح

يطل صباح .. ويفوت غروب
في بحار النور أتوه وأسوح بين الدروب
وفي فرح شموع أتوه وأكوس نجمي ...
وأنزح زي عوالما شافا في روض

مع السراب وسط النزوح ...

مع السراب فوق البعيد تسوقني الريح لفرح بعيد
كاسيهو ريد سقياهو فرحات الطيور ....

مع السراب تتوقد مسارج الروح
وتطل رؤياي وأسبح بعيد واسبح بعيد..

مع السراب ...
واسبح بعيد ...


دنيتنا الجميلة

ما هي دنيتنا الحميلة
شوفو دنيتنا الجميلة
بوديانها وصحاريها ونخيلها
بأنهارها وبا أزهارا النضيرا
ماهي دنيتنا الحميلة ...

الشمس كل يوم بتشرق
أصلو ما اتاخر شروقها
فى العشية تسيبنا تغرب
ياخي سبحان البسوقها
ما هي دنيتنا الحميلة ....

أي واحد لو فكر وقدر
عظمة الخالق بتطهر
يبقى واجبنا العلينا
نبتهل نرفع أيدنا
و نعمل المفروص العلينا
ماهي دنيتنا الجميلة ...

أربعة فصول في السنة
يمر عبر الأزمنة
الشتا والصيف وربيع وخريف..
ماهي دنيتنا الجميلة ...



حب غيرو

يا الناسيك وما حاسيك
وما وراك تقديره
وراك الهوان في عيونه
في خطوات مشاوريه
حب ياقلبي ريد يا قلبي
حب يا قلبي حب غيرو

من جواك أشيل الشوق
شن معناتو تفسيرو
والطاريك كان يغشاك
مارضنيك تأثيرو
أنس الناسي لي الألفة
أنس الخانو ما يضيرو
رجع ليهو بسامتو..
ردها ليهو بسماتو..
وأهرب من تصاويرو
حب يا قلبي ...

اوعك ترعى عنوانو
تقطف وردة علشانو
حاول أنسى كل غناه
كل غناه كل غناه ...
كل أشعارو والحانو
للجيران بريدوك
بخت الرادو جيرانو...
يا ليل يا ليل يا ليل

يا الناسيك وما حاسيك ....
حب يا قلبي ريد ياقلبي
حب يا قلبي حب غيرو



غلبنا الهوى

غلبنا الهوى غلبنا .. عذبنا الهوى عذبنا
غلبنا ومشتاقين ليهو .. عذبنا ومحتارين فيهو
الشوق الشوق الشوق في عينيا وعينيهو
دوبنا وراه عذبنا ...

نسير في قلبك الخالي .. عمرنا يضيع بلا معنا
نذوب تحنان في ماضينا .. شوقنا إليك لوعنا
نسير ياقاسي لو ترحم .. نطولك وأنت تمنعنا
غلبنا الهوى ......

نعيش الليل نقضيهو .. مشاعر سامية في حبك
نأمل لو تسايرنا ... تقلل في الصعاب دربك
حرام يا غالي تعذيبنا .. متين؟ تسعدنا بجيتك
غلبنا الهوى ...


بفرح بيها

بفرح بيها بفرح بيها ...
البنيه الهاجده في احضان خواطري ..البشتهيها
بفرح بيها .. بفرح بيها
البنيه اللامست ايد السعاده..وضجت الاشواق عليها
بفرح بها . بفرح بيها

الحبيبه .. الايقظت نبض الحروف
بقلوب صدر الكلام
القريبه .. الزيي لي
في عيونها برتاح الهيام
دي الشوقها نص الليل بصحي
غامض الغمضه وجليها
بفرح بيها..بفرح بيها

ليها بتحن القوافي ... بيها تندسى المرأفئ
الجمال الشايفو فيها الجمال الشايفو فيها
في رحاب دنيتنا مافي
جايه من فوق البنيه
ولامست إيد السعاده .. وضجت الأشواق عليها

بفرح بيها بفرح بيها .....


شايل جراح

شايل جراح فى الغربة مشتاق لعنيك
اسرح واعيد الكان بعيد خطواتى تتلهف عليك
واهاتى بيك وأحن إليك...

شفنا القمر سرحان يطول يـــــــــــاليل يـــــــــــــطول
شوقنى لى نور وجنتيـــك ضمينى لوكان فى خــيال
لــــــــــو فى خيـــــــــــال ختينى لحظات بين ايديك

زهــــرة صباى جنــــة هــــؤاى امــــشى واتوه وارجع واجيك
بعدتنى عـــــنك غــــربتى وفى خـــيالى ديــما
اشوف عــنيك واهاتى بيك واحن اليك اليك ....

فى بسمتــــــك احتـــــــــار واقيف
فى نظرتك خطوات مشيـــــــــــــك
برع القوام محيك يقيف للعاشقين
رحــــــــــــلة غيوم تحمل رسائلى
فى الوطن تــــــسال عليــــــــــــك
لابــــد اعــــــود فى يوم اجيــــــك
تــــتزفى لى واتهنــــــا بيــــــــــك

واحن إليك وإحن اليك واحن إليك..



22/ البوم عدت سنة
فرايحية

في عيون بسامة فرايحية ..
يا موانئ بعيدة ومنسية ..
والريد من قبلك ما كان ريد ..
ولا بعدك شفنا الحنية ....

بالصدفة لقيتك يا آسر..
غنيتك الحان ومشاعر..
ورسمتك احلام في الخاطر
عنوان للريدة الابدية..
يا مراسي حنيني وافراحها
يا سكة عجيبة ورواحا
لمتين دنيا يحلا صباحا
تصحا الاحلام الوردية
والريد من قبلك .....

سافرت كتير جوه عيونك
لونت مشاعرك وظنونك
ولقيت الدنيا دي من دونك
زي مرة واحزان وأسية
والريد من قبلك ......

كلمتك عن بكره وبعده
عن املو وافراحو وسعدوا
عن عاشق حافظ لي وعدوا
لو يلقا معاك لحظة هنية
والريد من قبلك ما كان ريد
ولا بعدك شفنا الحنية ....



الله يكون في عونك

الله يكون في عونك يا مفتون ظنونك
ربي يكون في عونك يا مكتول ظنونك

هل معقول بعدت في اليوم البعدت
هل يعقل بعدت بعد ما عمري عدا
فات مني بمدة الله يكون في عونك
الله يكون في عونك يا مفتون ظنونك

وفاكر بدونك الأيام بتصفى
أو حتي الليالي من غيرك يا غالي
بتفضل فيها إلفة لما تعود وتسأل
كيف الحال تبدل معقول بردو صدفة
فاكر يا مكابر بريدك تجاهر وتسالم بلهفة
الله يكون في عونك يا مفتون ظنونك...

طعم الريده دائما أحساس بالمحبة
أفراح في التلاقي أحلام فينا تربى
يا رقة مشاعر يا زحمة خواطر
عشان فينا غربة بس كيفن حننسى
منك ريدنا لسه في هواك شب
الله يكون في عونك يا مفتون ظنونك


كلو منك

كلو منك بس لأنك غضبن عنك
ناس بقولو نيابة عنك أنتي القلتي القالوك عنك
رغم أنك أنتي عنك عارفة أكتر
عارفا أنوالبينا أكبر
بعترف ليك في وجهيك اني ما لا قيت شبيهك
في ظلال رمشات عيونك قلبي رايدك ومستريحك
لهفة الفرح الموله في قليبي الصار ولوفك
ترشفي العبق المعطر من حواجبك وفوق جبيهيك

كلو منك بس لأنك غضبن عنك
ناس بقولو نيابة عنك أنتي القلتي القالوك عنك
رغم أنك أنتي عنك عارفة أكتر
عارفة أنوالبينا أكبر

يذرف الزمن الممكن في عميري الشايله تيهك
في رهاب عقبة عيونك أنا لما يجيني يجيهك

كلو منك .......

عدت سنة

عدت سنة ومرت سنة
وانا لسه يا قمر الزمان عايش على ذكراك
لا قربت خطواتي اليك لا طيفك الغرور دنا

لا قلبك القاسي سأل يوم عن عيوني وطمنا
لا عيونك أنتي مع البعاد يا حلوة هزاها الضنا
لا أتحقق الوعد القديم نتلاقى كل ألأزمنا
ومرت سنة

الليلة عيديك ياهنا

يا ستنا يا ضينا يا قمرا زانت عمرنا
نلقاكي هياجتا الطروف عبق الحروف والامكنة
وعربد علي الكتفين حرير زاهي ومثير يا ستنا
وزغرت كمان مليان حنان فياض أمان دفاق سنة
وضحكاتك النغم اللجميل لاتنسي بالبسمة يزداد عمرنا
ومرت سنة


الشوق غلبنا

ياما الشوق غلبنا توهنا وغربنا
ياما سهرنا ياما ودرنا ...
غلبنا الشوق

للفرحة أنا ديمة بغني
للأيام الطيبة بغني
للحلوين أطفالنا بغني
يا السعدو وميعادو بغني
ليك يا شوقنا يا مغلبنا
ياما الشوق غلبنا ....
غلبنا الشوق غلبنا ..
يا سلام يا سلام سلام يا سلام
يا ليل لما تغيب وتجينا
يا سلام لو الأيام تدينا
بهجة وأفراح وقليب صداح
من جنة لجنة نطير سواح
هدينا رسينا بيك يا شوقنا
يا مغلبنا ياما
ياما الشوق غلبنا ...
غلبنا الشوق ...
ياما الشوق غلبنا توهنا وغربنا
ياما سهرنا ياما ودرنا ...
ياما كم جربنا وغلبنا
ياما الشوق غلبنا ......


شمس المزاد

قوم بينا العمر رحلة
فوقه الغيمة مبتهلا
بنفرح بشذا النوار
وقت شمس( المزاد) تحلى
وقوم بينا

وأعزف ليك نغيم قلبي
ما أنت في الرموش كحولاك
وآخدك في العمر رحلة
فوق للغيمة مبتهلا
وأشيلك في العمر رحلة
بيك الغيمة ميتهلا
وطول العمر بهواك
يا ضي القمر واغلى

قوم بينا العمر رحلة
فوق الغيمة مبتهلا
بنفرح بشذا النوار
وقت شمس ( المزاد) تحلى
قوم بينا سيدي قوم بينا

من دون ميعاد تقابلني
أشوف عينيك تغمرني
أعاين ليك تفهمني
أشيل عنك تشيل عني
أشيل حزنك تشيل حزني
لا منك ولا مني

قوم بينا العمر رحلة
فوقه الغيمة مبتهلا
بنفرح بشذا النوار
وقت شمس( المزاد) تحلى

قوم بينا ......




ميعاد قطاري اتاخر

ميعاد قطاري تأخر شفقت ما أستنيت
لقيتا لونا مهاجر حمرة أتدليت
هيييهيي

طلعتن قوزن عالي عاينت في الوديان
بدور أشوف الصيدة السارحة ليها زمان
آسرة قلبي معاها خليتو ليها ضمان
آسرة قلبي معاها سبتو ليها ضمان

وقفت جنب التونكي عطشان بنادي عليها
يسقيني بقة موية من الحنان الفيها
ما ليقيت بقك طاعم شايلة في أيديها

لمحت بدرا فوقي حيته كيف أمسيت
سألتو ليه في غيمك متواري ما ضويت
قا لي قاسي علي البريدو ولبيت
هيييييييهييييييي

بنية من لاقيتا مليحة تملى العين
رزينة والله اداها قليب ملاه حنين
العايشة في وجداني وروني دربها وين ؟....


23/ البوم القطار المر
يا بسامة

حليوة يا بسامة الفايح النساما
الريدة في قولبنا والله علاما
طالبين سلاما ما تبقى ظلاما
خيا دي الدنيا هي دي الدنيا
معدودة أيامااااااااااااااااااااااا
يا ليل يا ليل ياليل ليل ليل

فيك الوساما الله رساما
فيك الوساما الله رساما
( و محمود محمود محمود)

فيك الوساما الله رساما
ضميرة من الصيف
ضنيرة من الصيف
والحكمة في القامة
فيك الوساما الله رساما
فيك الوساما الله رسااااما
( الحوت الحوت الحوت )
خضيرة رشاما مخلوقة ليك شامة
فيك الوساما الله رساما
طنيرة من الصيف
طنيرة من الصيف
والحكمة في القامة
خضيرة رشامة مخلوقلة لي شاما
خضيرة رشامااااااااااااااااااااااااااا
( حوتا يا سيدا سيدا حوتا يا سيدا سيد حوتا يا سيدا حوتا )
( سيدا ااااااااااااااااااااااااااااااااااااااا )


البلوم

البلوم في فرعو غنا
طرانا يا الحبان أهلنا
طرينا مشوار العصاري
ورعشة الورد البلالي
البريد داير يداري
والقلوب كايسة المحنا

يا دموع لمتين تفارقي
يا شروق لمتين تلاقي
أبكي يا دموع السواقي
حظنا العاثر ظلمنا

الزمن غلبنا ياما
حرمنا شال الابتسامه
يا المسافرين بالسلامه
أشرحو الحال لاهلنا

الغمامة حلاة رحيلا
فوق روابينا الجميلة
الطيور جات لي مقيلا
كلموها خلاص رحلنا

طرينا مشوار العصاري
ورعشة الورد البلالي
البريد داير يداري
والقلوب كايسة المحنة

البلوم في فرعو غنا ....



العيون السودا


أهوى العيون السوده
وأحب سمار في خدودها

إنت الصباح الضاحك
وإنت الغروب الباكي
إنت المياه العذبة
إنت النسيم الصافي
بهواك وأزيد في حبي
مهما تزيد في نوحي
وقلبي راح لقلبك
يا سيدي مالك روحي

حيد عيونك عني
حيد جمالك عني
لغة العيون كاتلاني
حب الجمال جنني
شوق الوصال أضناني

كف عيونك عني
لغة العيون كاتلاني
حب الجمال جنني
شوق الوصال أضناني

أهوى العيون السودا
وأحب سمار في خدودها ...





"ليك مدة ما بنت"


*****
ليك مدة ما بنت وأنا في اشتياق لي شوفتك يا حبيبي وين انت...

*****
لي مدة من رؤياك يا ليتني كنت .. شفتك ولو في النوم يا اللي العهود خنت...

*****
بدر الكمال دونك دُرت وتكمّلت.. مع اعتدال قامتك زي الفرع ملت...

*****
ضاوي الجبين بضياك للبدر فاخرت.. غابت كواكب الكون حين انت نورت...

*****
برضك مُسامَح إن أنصفت أو ملت.. برضك حبيب مهما في حبيبك أهملت...

*****
ليك مدة ما بنت وأنا في اشتياق لي شوفتك يا حبيبي وين انت...




يا رائع


يارائع جفيتني .. وأنا ضـائع تعـال لي
الخـده لال تعــال لي .. دقـائق قٌـلال تعـال لي
معني الدلال تعـال لـي .. والحـب حـلال يا عيني
ضنـاني الجـوى تعـال لي ... وشـوفتك دوا تعــال لي
عـارف الهـوى تعـال لي .. والأرواح سـوا تعـال لي
يا مـزدهـر تعـال لي .. زينـة الـدهـر تعـال لـي
في شـاطئ النهـر تعـال لي .. بين الزهـر تعـال لي
ظبـي الأراك تعـال لي .. لي حنيف ضراك تعـال لي
خلينـي أراك تعـال لي .. مـا بريـد براك تعـال لي
يا مـزدهـر تعـال لي .. زينـة الـدهـر تعـال لـي
في شـاطئ النهـر تعـال لي .. بين الزهـر تعـال لي
الما شاف سروح تعال لي .. أشفي الجروح تعال لي
أنا لي روح تعالي .. قبال تروح يا عيني
ناير الخدود تعالي لي .. سيب الصدود تعال لي
خلي ودود تعالي لي .. بجبك بالحدود يا عيني
ظبي الحقول تعال لي .. سوي الأصول تعال لي
بين الفصول تعالي لي .. وعز الرسول تعالي لي

يا رائع جفيتني ..وأنا ضـائع تعال لي .....



القطار المر

في الرصيف مستني
وللثواني بحاسب
امتى يظهر نورو
الليه ديمة براقب

القى فيه هناى
يلقى فيني هناهو
ننسجم لريدنا
الكان يا مريودي

القطار يتهادى
حل في وادينا
يلا نجري نروحو
المن زمان ناسينا

قلبي زاد خفقانه
و زاد كمان في ولاه
للحبيب الماري
الليهو زاد شوقي

الاشرجي تراه
للاشارة اداهو
فتحوا السنفور
لمروره براهو

السلامة سلامة
ياليل سلامة سلامة

اه خلاص جنيتا
في المحطة بكيتا
يا القطار تدشدش
يا الشلت مريودي

القطار المر )هذا المقطع محذوف )
فيه مر حبيبي ) لكن محمود كان )
بالعلى ما مر ) بغنيه في الحفلات )
يا الشلت مريودي) والمقطع أصل الشريط)



ما أعتيادي

يا الجمالك زينة بادي في رضاك غاية مُرادي
تكفي منك إبتسامة ويا المعاك راحة فؤادي
حُبي ليك حُب ما إعتيـــــــادي

قلبي بلقي الفرحة جنبك لو تحن وتسيب عنادي
عارفوا بتقسيهوا قلبك ليه بتتعمد بعادي
حُبي ليك حُب ما إعتيـــــــادي

زيد في دلك وزيد في تيهك وأصلو ما بغيير في ريدي
إنت الحان عمري كلوا وإنته أنشودة وجودي
حُبي ليك حُب ما إعتيـــــــادي

أيه جنيت وانا حبي طاهر كل يوم يزداد شرودي
قول سبب علل صدودك ديمة بفرح بيك مرادي

حُبي ليك حُب ما إعتيـــــــادي...



عشقتو من نظرة

عشقتو من نظرة هو قلبو خالي
كيف الطريقا البيها يتم وصالي
ما أصلو ما ممكن يرد لي سؤالي
كأنوا ما شاعر كيف بشغل بالي
يمر علي كالطيف وتضوي اللآلي
العقل فار واحتار فيك يا غزالي

سألت مين ياناس هذا المثالي
اليانعة وجناتو والخصروا بالي
المحتشم ومهذب وطرفو حالي
هل حور أم أنسان أم شيء خيالي

وفضلت أترقب برقو الموالي
وأمتع النظرات في كل غالي
ياالرموش العكسن اعتدالي
ويا ناس و ياناس أجيبوني عن سؤالي

وقالو لي ده الملهم في نفسو عالي
وفارض علينا هواهو وهو سالي
ده المستحيل ينزل من العلالي
ده الموحي للشعراء الدرر الغوالي
عشقتو من نظرة هو قلبو خالي
كيف الطريقا البيها يتم وصالي
ولكن غرامي عفيف وأنا ما ببالي
وروني وين أهلو أكسب منالي




العودة تاني

يا قلبي السراري وفيك كاتم أسراري
حبيبتك أبعدوها وسكنوها البراري
سمح الريد أباني متين العودة تاني

يا حنينة الضراكي شريكة الروح براكي
أنا قلبي باركي وما بنفع بلاكي

مايسة قواما وزة ولقولبنا أستفز
والنورالمطلسم مال على بعضة هز

ودائما فكري دايح قلبي صبح سرايح
مالك يا الحمامة ما بتزوري الضرايح

مايسة قوامها بانة وعادا الناس لبانا
سحرنا جمال خدودا ورمش العين سبانا

يا قلبي السرارى فيك كاتم اسراري

24/ البوم خوف الوجع

شـــوق العيــون...

شــوق العيــون وقت مايسوق عليك خطوات

يداعب في الخيال محيك وأعاين فيكي كم مرات

بضمك في القلب افراح واسعد في العمر لحظات



مشاوير الفرح عندي تطول لمن تشوف عينيك

مسافات الحزن تقصر وقت خطواتي تمشي عليك

اجيك شايل حنان ريدي .. اجيك ياحلوه مشتاق ليك

اعاين في سراب طيفك.. ترقرق في العيون دمعات



على وعد العمر برجاك .. على بعد المسافة اقيف

اغازل في حلم لقياك .. على شاطئ المحبه خريـف

يظلل غيمك إنتي هواي .. من وهج الهجير والصيف

واسرح في جمال حسنك واكتب شعري فيك غنوات

شوق العيون...

******


صمـت الشــوق...

اقول ليكي و لا اخلي صمت الشوق يزيد البي على البيكي

اهاجر في جمال محياك واسيب عينيا لعينيكي

بكون ماسخ كلام الريدا لما يقولو ليك لسان

تتبكم حروف القول و مابتعكس شعور ولهان

يسبح في سعير شوقك على موج الهوا البركان

يحرق في حشا الاحساس ويخلق قدرة الإمكان

أصادق صمتك البواح واكبل انطلاق السيل

من القلب العزف اهاتو بذكراكي عز الليل

آنين نضداح من الاعماق يفيض بكل تقيل الشيل

ونكـتم لهفة الاشواق مع الفرح البشد الحيل

أقول ليكي ولا اخلي صمت الشوق يزيد البي على البيكي

أهاجر في جمال محياك واسيب عينيا ..لعينيكي...

*******






حـــال الريـــــدا ...


اكيد ماكان بايدك فراقنا و لا بأيدي

دي جراح لابد نعيشا ودا حال الريدا سيدي

الريد ياناس عذابو صادني وشفتو دابو

توبه من المحبه الريد انا قلبي سابو

صبرتا وكنتا حابي تجي ويطفيها ناري

خاب ظني ورجايا شقاي ضاع و انتـظاري

رضينا خلاص بعادنا بقت احزانا زادنـا

زمان الفرحه ولا معاهو رحل ودادنـا

اكيد ماكان بايديك فراقنا ولا بايدي

جراح لابد نعيشا ودا حال الريدا .. سيدي...
*************


مابتقدري...

مـــابتقدري..حلوه حقو تفكري قبال قرارك تصدري

ومـــابتقدري..

اتذكري انو الهوى غلاب وسلطان الغرام مابتقهري

واتصوري انك قدرتي على النوى القادره للنوم تشتري

ومــابتقدري..

اتمهلي من قبل ماتتهوري ياواحده دون الناس

ومــابتتكرري..

أحلى زولاً غنو ليه .. ليك الدلال ادللي

ابقي البحر بدلا ليه ابقي السما بطلع عليه

ماتهددي وتتعللي وخليهو قلبي على العليه

مـــابتقدري..

حلوه حقو تفكري
******************

خوف الوحع


منـــك طلع خوف الوجع سيبك بلاش ماتبقي خوف
ابقــــي الصمود ماتبقي زيف
ابقـــي احتمال نبض الحروف
ماتبقي خوف ابقـــي الصمود
،،
منك بدت خطوات مسير عمري المعطر بغناك
فرح السنين اعتز بيك شـــان انتي فال ونبيل هواه
دفقك بحر سيل الخريــــــف زاخات تهش منك سنة
يالضحكه فـــي الزمن الوجيع عمري البريدك وفي رجاك
ماتبقي خوف ابقـــي الصمود
،،
ابقي المباهج والضريــح خلينا في ضـل نستريح
نعبر مدن اعمق خيال نتغنــي باللهج الصريــــح
السمحة الجاية ومــافي خوف الجاية من كل الظروف
مرسومه في لوحــــــة جمال مرتاحه في قلبي الجريح
ماتبقي خوف ابقـــي الصمود
،،
انسي احتمال طولـــت مجيك عاودينا في أجمل فجر
يالقادله في توب العفاف بي هيبه خايله عليك تجــر
راجين عيـــونك لو تبين في روعة مشوارك عصر
بي لهفه نفرح وليـــك نقيف لمن خيال طيفك يمر
مـــاتـبــقـــي خـــــــوف


عشان سمحة

عشان ما نحن بنريدك
عشان سمحا
تمسكي في ذنب واحد
ربنا للذنوب بمحا

عشان أدوك عيون تقتل
تشيل من العيون نوما
تحزي الناس على هموما
ظالمة تقولي مظلومة

عشان أدوك لون تبري
المي البي بتخبري
تخليه السهر قدردي
تقولي من العلي تبري

عشان عارفة ما بنريدك كيف
غيرك مافي لينا وليف
ربيع أعمارنا يصبح صيف
وأحتار في البقوله وأقيف

عشان ما نحن بنريدك عشان سمحة ........



ست الفرقان

القاكي وشايل الريدة يا النافرة متل الصيدة
يالنافرة متل الصيدة أنتي الفي جيلكي فريدة
هييهيهيهيهيي
يا ريلة ست الفرقان شوفتك لي أمان
بهواكي لي زمان من جوه نابعة حنان


القاكي وشايل الريدة...

بريدك والله يا نايرة فرح القلوب الحايرة
ياحبيبة قلبي ياحبيبة قلبي ياحبيبة قلبي
درب العشاير السايرة

القاكي وشايل الريدة ...

ريدتك ديمة جديد زي صباح العيد
دي الدروب بتجيب من قريب وبعيد

القاكي وشايل الريد ...

25/ البوم مرت الأيام
مرت الأيام
مـرت الايـام كالخـيـل أحلام
وانطوت امـال كـم رواهـا غـرام
مـــرت ومــــر نـعـيــم
كان ظني فيه يدوم لكنه مر سريـع
خــلـــف وراه هــمـــوم
الامـــا مــــا بــتــزول
مـــا بـيــن ارق وذهـــوع
مـاكــان جـــزاي اهــيــم
سـمـيـري يـبـقـى الـليل
وهـوانــا لـســه ربــيــع
مـاكـان خـطـر فــي الـبـال
الـقـاك ويسحـرنـي تعـبـيـرك
او حــيــن اراك تـخــتــال
القاك وافــوز بتـقـديـرك
نتـلاقـى فـــي الاحـســاس
والـــحـــب يـغنـيـنــا
بالبهجة والاينـاس والحب يغنينـا
والـبــدر لـيـنـا سـمـيــر
ذكـــراك مـــا ذكــــراك
غـيــر الـعــذاب الــــوان
لو استطيع انساك او اعرف السلوان
مـاكــان ملـكـنـي هـــواك
يـا ريـت هــواك مــا كــان و
انـسـانـي لـــو تـنـســى
انـــا بـرضــاك راضـــي
انـــا لــلــوداد ذاكــــر
انـــا بـرضــاك راضـــي

طـــول عـمــري اتـاســف
مـــن حـســرة الماضي
واعـيـش عـلــى الحاضر







صدقني ما بقدر اعيد

صدقني ما بقدر اعيد
قصة غرام بالشوق مضت
رحلة عذاب دابة انتهت كيف تاني ترجع من جديد

من عمري اهديتك كتير
اخلصت ليك وانت بتغير
و الغيرة كم فرقت قلوب طريقها كان مخضر نضير

من بدري خليتك انا
و نسيت عشرة كم سنه
ما انت ضيعت الهنا
كل السعادة العندنا
كتبت لي ريدنا الفنا و بقت النهاية المحزنه

الليلة بتقول نبتدي
لازم انا انسى الحصل و ليك اجي
وافرح عمرنا وينتشي
انت فاكر حبي ليك لسة ندي
انا حبي ليك بدري انتهى وزي الما كان بيناتنا شئ
اعذرني ما بقدر اعيد



الشوق والريد

الشوق والريد والحب البان في لمسة ايد
وأغاني نقول ونعيد
والدنيا زهور فى عينينا
تصبح كل يوم زي طفل وليد
**************************
كل الأشواق وآهه بتجرح قلب المشتاق
ليك ياهاجر ليك رسالة
لو روحك يوم تنسى دلالها
ليك رساله
تشوفنا قريب ماتتعالى
نسألنا وتسأل وعن حالا
نعيد الكان حليل الكان
نخلي الحب يسرح بينا
يبقي جناحين ويطير بينا
*************************
نشوف الدنيا ربيع و زهور
نسكت و تتكلم عينينا
ليك رساله
نعود أحباب زي ما كنا
في دنيا الحب نلقى الجنه
يا حبيب الروح يا أغلى غرام
أسأل قلبك برضو يقولك
لو كان حنا




طار قلبي

طار قلبي وقال ماهـو عـايد مادام مفارقه اللي أرواحنا سايد
يا قلبي تعذيبك ما هو فايد أصبر عسى المحبوب يبقى جايد
قال لي كيف أصبر وأنا جمري زايد وكيف اسلي الغصن المن طبعه مايد
إذا الوداع ياقلبي وحبيبـــــي وأهـلاً ضنـاي الحيــر طبــيبي
فارقنـي حِـبي إرتاح يا رقيبـي ويا نجـوم سعـودي إتلاشي غيبـي
دي من دلالها دائمـاً وجـوله قاسية وطموحة نافره وخجولة
شكت الألم من لمسان حجوله وليه بي بـُعـاده الأيام عـَـجوله
ما بنسلا ِريدَها مهما أزانا بنعشـق عفـافها المازجـه الرزانـا
بنهواها موتنا آخر جـزانا آهـ لو تنـاجي قلـوبنا الحـزانا
ضـاعت قَلوبنا الخِـلان نعـوها وأسباب حـِزنا ليه ما وعـوها
يا قلوبنا بالصد ما تدعـوها موتكم وداعها وهيا ودِعـوها
.......





جاني طيفه طايف

----------------------
جاني طيفه طايف لحاظه كالقذايف
وانا من عيونه خايف والله خايف
جاني طيفه طايف في ثوب من الطرايف
خدود كالقطايف ليهو العنب شفايف العنب شفايف
ياملهم العواطف ومهدل المعاطف
متي ياجميل تلاطف وتكون علينا عاطف
تلا في هواي صحايف ولقي حبي غير زايف
قال لي اراك خايف ودون تشرح انا شايف
حبيبي دمعي زارف غرقني سيله جارف
لماذا عني صارف وهالكني وانت عارف والله عارف
حبيبي انا حالف في عوازلي فيك اخالف
متي ياجميل تلاطف وتكون علينا عاطف



الجرح ألأبيض

أنا لو نعيم الدنيا عندك احرميني
أنا لو جحيم الآخره ملكك عذبيني
يا ضناي ياوهج اشواقي الحبيسة
جرح اصبح ما بسيل لو تجرحيني
لو شقاي لو حالي سرك
بالعذاب أيه جاءني لولا ك .
بيتي كان عرشه أفلاك
ليه هجرتو وقصدت دنياك
أنا سيرتو دربك أشواك
لا أنا قادر تاني أرجع
لا مشاعرك راضية تسمع
الحياة غيرك صحارى
والسعادة محرمة معاك وآنيني

كان أمل كان أمنياتي
كان شبابي أنا غالي عمري
ياما كنت بخاف عليهو
ليه تنسي ناره ونطفي نوره
ومن حنانك تحرميه
أه من حنانه تحرميه
لكن حصل حتى الأمل
راح وأندثر راح راح وأندثر
يوم قلبك الخداع نكر
أخلاصي وأشواقي وحنيني

في الماضي حسيتك نغم
وأتمشى قي قليي الحزين
والليلة لاقيتك عدم
كأنت فارقتك سنين
بين يوم ويوم خف الألم
وأحساسي بجرحي أنعدم
صداكي أصبح يا نغم
أحزان عميقة بتعتريني




لي زمن بنادي
لي زمن بنادي أنا للخديد أنادي
ياناس محبوبي ساكن قصد عنادي
*********
مع نزول دموعي أذا أشتعل زنادي
أصده سواه وأوجه أستنادي
**********
متين يهل هلالي وأسمع المنادي
ينادي عن حبيبي وأقول ترك عنادي
**********
جميل وصف جمالك يحير الشوادي
مادام نفرت مني عملت قلبي وادي
********
تجدني لو اقبل خدودك النوادي
اذوب من اللطافه يذوب معاي فؤادي
*********************
اسامحو لو ازاني لو خلف ميعادي
حبيبي لو هجرني بحبو ما بعادي
*********
احب تملي قربو يحب دوام بعادي
خلاني عن وصالو وشمت الاعادي
*********
اراك اثرت قلبي شلتو في الايادي
اراك نفور وجافي بعيد عن اصطيادي
*********
لي زمن بنادي للخديدو نادي
ياناس محبوبي ساكن قصد عنادي


26/ البوم ساب البلد

غزال القوز

توا لي حولين
زرعي ما جيتا
ضهبان ورا (ام زين)
جوادي خليتا
قريافة ساقني بعيد خريفي عديتا
ضحك الزمن فوقي مرادي ما ليقيتا
فوق الفريق صفق سدت عجوز بيتا
يا غزال القوز فوق الرهيد أرتع
بشكيك لرب الكون الفي العيون ابدع
كيف أخلي ( أم زين ) فقيري بركت
فوق الرمل ضربت مصيري ما عرفت
ما تقول لي شوطن شوفوها يوم تمشي
عارفة الودع كداب في الريدة ما جاب شئ
أبا الفقير بلباص
كمل قريشاتي
دخني بالبخرات
محايتا شربني
قال في الكتاب مكتوب بعد الخواتم شيء
قلب الغزال ( أم زين ) لقلبي ما بمشي



معنى الغنية غزال القوز
مر عامان ولم اقصد مزرعتي
تايه أطارد الجميلة
حتى اضعت جوادي
انظر..الى ذلك الغزال وهو راتع على خور الريهد
اشتكيك لله خالق الكون الذي أبدع عينيك
أبي الشيخ رجل دجال نصاب
خدعني واستولى على أموالي
دخنني بالبخور وسقاني (عصير الكتابة)
لو إن هناك سورة في القران بعد السور الخواتم
لن تفلح في أن تجمعني (بأم زين) مرة أخرى






تباريح الهوي

الجاني منك ومن تباريح الهوي
وصفو بصعب ياجميل
وبعدت عنك ولما طال بي النوي
بقي لي اسيبك مستحيل
*****
تبقي سيرتك هي الكلام
وتبقي صورتك هي الرؤي
الحلوة البعيشها في صحوتي
او حتي في عز المنام
ويبقي اسمك هو الغنا
هو البخفف لي عذابات الضنا
ما الشفتو منك يامني الروح ياهنا
وبعدت عنك ولما طال بي النوي
بقي لي اسيبك مستحيل
مستحيل
******
بشكي ليكم يامظاليم الهوي
اصلي مجروح مرتين
يمكن القي الزيي فيكم
بلقى يلقى الزيي فيكم
بشكو ليكم يا مظاليم
قليي مجروح مرتين
يمكن القي الزيي فيكم
بلقى يلقى الزيي فيكم


ضاق جراح الحب ومتعذب سنين
يمكن القى وصفة تنفع
يمكن القي حاجة تخفف الجرح القديم ولا
حاجة تشفع
******
الجاني منك ومن تباريح الهوي
وصفو بصعب ياجميل
وبعدت عنك ولما طال بي النوي
بقي لي اسيبك مستحيل



كـــــــدة برضو

كدة برضو تفوتنا وتنسانا .. يا احلى عبير كان بغشانا
مع كلو صباح زى الافراح يغسل اعماقنا الحزنانة

لى هجيرنا وحاتك كنتا القيم الديما سحايبو بتطرانا
ومرات بى النسمة الرواحة مرات بترش فينا حنانا
لى عزاب كمان كنتا البسمة ولى مشاعرنا كنتا امانة
كدة برضو تفوتنا وتنسانا

يا سيدنا وسيد كل الحلوين ح تجينا متين ما تقول لينا
دايرين نفروش ليك فى الميعاد ارواحنا مهاد
بتفتح مليون ياسمينا .. لاقنك وين والزيك مين
ما انت اميرنا ودنيانا .. كـــــــــدة
كدة برضو تفوتنا وتنسانا

كـــدة
كدة برضو تفوتنا وتنسانا .. يا احلى عبير كان بغشانا
مع كلو صباح زى الافراح يغسل اعماقنا الحزنانة


ساب البلد

ساب البلد سافر بعيد
بكت الدموع وريدنا النبيل
خلانى خلانى فى عمق الجرح
مع ليل طويل ... عايش وحيد.. وحاير دليل
لكن روح ..... يا حليل

دة القال زمان .. قال زمان ما بنختلف
لكن سنينا مشت سريع زى الزمن كان بنحرف
قول لى كيف ترحل تسيبو وقليبى بعد كل العرف
الريدة والود الكان تنساها كيف بعد الولف

و سنين هواى ضاعت وراك دى
كل الامانى الكان معاك وفى ضراك
ريدة القليب هواهو هام وإصطفاك
انساهو لو تقدر دوام تابع مسيرتك بى هواك وبى رضاك


مداخل ريدك


ختي يمينك في ايدينك يشرح قلبي مداخل ريدك ترسخ في جوه الشوق وتجيني
سيبي عيونك اسرح فيها بكل رقه وتسرح فيني
خلي وضأة محيك تغسل همي وتضوي جبيني
انسي ظلالك في دنياي ترسم زهره شزاها حنيني
ضمي حروف الشوق السارحا كانت تايها وكاتما انيني
بكره بيكبر عهود امالنا يفرض نفسو دليل لي يقيني
تبدا الفرحه تبرعم تاني تبقي منوره باقي سنيني



يا نسمة

قبال ما خطالبي يصل
يا نسمة جيبي خبر
أنا ليهو شوقي شديد
يجتاز حدوده بعيد
لو معاي يزيد
لا مل مني فتر
يا نسمة جيبي خبر

الشادن الفنان
جنن نهاي جنان
أنا قلبي ليهو مكان
جنة زهور وأنضر
يا نسمة جيبي لي خبر

هناي في قربو
أنا ما بسيب دربو
أتمنا من قلبي
يطراني ويتذكر
يا نسمة جيبي خبر



سايق دلالو علي

سايق دلالو علي بنطرة بس أبي لي
كاحل العيون السود
ليه يا مليح الزي ليه ما تعاين لي
بنظرة لي تجود

طرفك مساهر بي شايل منام عيني
ما لاقي لي وجود
سايق دلالو علي بنطرة بس أبي لي
كاحل العيون السود

كل ما مشيت للحي يحرقني جمره الحي
ما لاقي لي وجود

حلمك علي يا ظبي عطفك علي شوي
حن علي وجود


27/ البوم أتفضلي
لهيجا عسيل

يا أم لهيجاً عسيل أنتظاري طال بالحيل
ست الفريق بلقاكي متين ترفونة هوي بلقاك متين...

يا البسيمتك برقا ظهر
أما شعرك ديس القمر
نورك أنتي حجب القمر
ضوى الظلام لي الليل ظهر
ضوى الظلام لي الناس بهر

يا أم لهيجا ....

زي (خيزرانة) مؤصلة
قامتك رشيقة مفصلة
عندك عيون ريم الخلا والله كملت الحلا
يا أم ليهجا عسيل ...



أتفضلي

أتفضلي أذنك معاك فجي المسامات وأدخلي
بكتب عليك حرف وبرسم معاك مستقبلي
أتفضليييي

ناديت عليك صحيت مزامير النغم
شديت سوراي مراكبي لريدك عشم
صبرت في ليل الضنا .. وكتبت في جرح الألم
أتفضلييييييييييييييييي

ياريته لو زمني العسير بيننا المسافات قصرا
تاني السنين صبحت سنين يا غالية رجعت لورا
ونشيل غناوينا الزمان ... يا نسمة ياغيمة وضرا
أتفضليييييييييييييييييييييييييييييييي

يا وعدي بيك كل النجيمات شارقة ليك
قلبك العرف بيك الهوى سلمتو ليك
أتفضلي وأنا لسه بردي بحن ليك

بكتب عليك حرف الغنا وبرسم معاك مستقبلي
أتفضليييييييييييييييييييييييييي



مشروق بهمك

لي سنين مشروق بهمك .. يا المشروقة بكل الهم
هسع كيف أنا أنهل منك .. يا الظمآنة في عمق اليم

أنا في الفيك أحترت حقيقة.. يا النطقتي جبل الصم
يا المرسومة في وجع الواقع .. وين نلقاكي متين نتلم
ياترياق الفكر الضائع .. كيفن أشوفك عشان أنجم


يا الدسيتي ملامحك في .. فيني ملامحك باقية علم
أنا نظمتك أحلى قصيدة .. في الدوبيت مسدار لم
أنا مشتاق والشوق أتعدى .. كل مراحل الكيف والكم
يا ماضي يا وكل الحاضر ... يسري هواك في مجرى الدم

لي سنين مشروق بهمك ...


مفتون بيك

أنا طولت مفتون بيك .. بشوف آمالي كلها فيك
و أٌقول يمكن يجيك حنين.. تبقي معاي وأبقى إليك

أسهر عيني وأتعذب .. كتير بطرفك الفتان
أتوه في سكة الحرمان .. ودرب اللوعة وألأشجان
حبك شايلو في خاطري .. أنت السلوى والتحنان

رغم الفرقة والدمعات ... قلبي راجي بالسنوات
رغم عذاب سنين وسنين .. شوقي طاغي والاهات
واتوه واسرح فيك مراح .. وأنسى معاك عذابي الفات



تبتا منك

تبت منك .. تبت من ريدك كفى
لا خطاوي الشوق بتوصل لا الأماني البينا صارت وارفة
تبت منك ...
أًصلو درب الريد مشاعر .. رعشة في الوجدان لذيذة
البدور الريد يضحي .... يهدي ليهو الروح عزيزة
كان مناي في الريد نحكي ... قصة للعشاق فريدة
فجأة أنتي بقيتي قاسية .. وأصلي عارفك جد عنيدة
تبت منك ....

تبت منك يا البنية رغم أنك في الحشا
أنت في جواي حقيقة رائعة يانعة ومدهشا
نفحة الزمن الجميل عمري في دربك مشا
ريدك الغول وحاتك بيهو كم قلبي أنتشا

تاني ما بلزمني حنك أمش أرحلي زي سحابة
وكنت مني وكنت منك .. تبت منك تبت من ريدك كفاااا


متألقة

متألقة متألقة متألقة متألقة متألقة

متألقة وزي الصباح الشمس طالة ومشرقا
فح وردة بشت بعبيرها ورونقا
وإيناس رقيق ينساب معاني منمقة
كلمات تطوف بيها الأماني محلقا
متألقة .....
جات بالصباح ناشر غيومه على المدى
البسمة نور والهمسة زي همس الندى
الروقا كيف الرقة والطبع الشفيف
ساكن هواها ما حن في قلبي الرهيف ...
متألقة

إية جمال روعة خصال
بهجة ودلال روعة ولادل
إية جمال روعة خصال
بهجة ودلال روعة خصال
في رحاب عيونك أتمنا في الارتحال

جيتنا تاني

جيتنا تاني تكوس حناني جيتنا تاني
ما خلاص ريدك نسيتو ما خلاص حبك نسيتو
سبتا ذلك وإمتهاني جيت جيتنا تاني ...

ما قبيل لما أبتدينا .. كنت واهبك كل حناني
كنت دائما ليك مخلص ..كلي فيك تقول كفاني
جيتنا تاني ...

أصلي قبلك ما هويت وأنت بعدك زاد هواني
كان مناي تكون معاي .. بسعادتك أبقى هاني
جيت جيتنا تاني ...

يلا أرجع ما بريدك ... أنت ما ريدك أذاني
شال شبابي وكل ربيعي .. من عذاب ريدك كفاني ..


شنو الحاصل

مانع رسايلك لي ما كنت بتراسل
أنشا الله مانع خير أكتب شنو الحاصل

تكتب لكل الناس تبخل علي أنت
عارفك بتقسى علي وانا برضي ليك ردت
لو هان عليك ريدي حبي وعليك هنت
أكتب عشان خاطر بحبي ليك بحت

ياسيدي بترجاك أرحم قليب دابو..
عرف الهوى الغلاب وماك حسابو
من فوق رمش لماح سحر العيون صابو
نظرات سهام عينيه مكتول بنشابو

28/ البوم الحنين

علمتك تمش
علمتك تمش... علمتك تمش
وحدك براااااك ماترتعش......سكنتك قليب وسدتك رمش
يا وعدى يااااااااااااااا
يا بهجة الوعد القديييييييم ... يااا لذة الحزن الالي ي ي يم
يابهجة الوعد القدي ي يم.... يالذة الحزن الالييييييييم
ياوعدا بجى من عين الشمس
لما الجرح يلمس حدود الاحتماا ا ال....براو بنجبر يعاند المحال
سيب الجروح تسرى فينا....والدمووووع ...تبقى لينا
عالم جميل ....وعالم نكارى....
علمتك تمش... علمتك تمش
وحدك براااااك ماترتعش......سكنتك قليب وسدتك رمش
يا وعدى يااااااااااااااا......علمتك تمش



بعد الغياب

بعد الغياب ...بعد الليالى المره فى حضن العذاب
عاد الحبيب المنتظر ...عودا حميدا مستطاب
ياللهوى ... ياللشباب ...ياللدعاء المستجاب



فى غيابك اضنانى الالم ... فقدت للايام مزاق
اندسى فى قلبى النغم ...اتجلى فى عيونى الفراق

اصبحت اشعر كالسجين ...لو مرت النسمات تطوف
من خلف شباكه الحزين ...تحمل من الورد العطوف
السلوى فى ضمة حنين ... والزكرى فى رحلة سراب

سر الغرام نبع الحنان ... قمريه فى قلبى الودود
غنت على سمع الزمان ... من وحى الهام الخلود
احنا التقينا على امل ...فعلاما هجران الصدود

وبحق من جعل القلوب ... شوقا وتحنانا تذوب
لا نفترق لا بعد اللقاء ....بعد الامل بعد الرجاء عاد الصفاء
عاد الحبيب المنتظر ....عودا حميدا مستطاب
ياللهوى ياللشباب ..... ياللدعاء المستجاب



أول جديد

الليله اول من جديد ....ابداك يا مشوار زمان
ودر خطاك على الدروب.... فى سكه ما عرفت امان



الليله اوال من جديد ... اتوســـــــــــــــد احلام العمر
افرد جناحى مع الخيال ... والريده ليك تعبر تمر
الشــــوق يزيد يغمر فضاك ...يغزل خيوط حبك فجر


يشرق صباح حسنك يهل ...يبقى الاسير فى الريد حر
تانى من اول جديد..


الليله اول من جديد ....
اتنسم ازهارك عبير ... يفوح اريجه مع الزمن
يسيل نداك على الحروف .... ويزيد معانى القول شجن


وارجع اهيم فى روعتك ... من تانى يا اجمل وطن
والليله اول من جديد .... تصبح عيونك لى سكن
تانى من اول جديد .... والليله اول من جديد


الحنـــــــــين (كلمتني عيونك)

انت ما قتلى لي... كلمتنى عيونى
عن مشاعر صادقة حية ... نابعة من اعماق شجونك
انت ماقتلى لي ... كلمتنى عيونى
عن حنين يغمر مسامك... فى حنايا روح سكونك
انت ما قتلى لي... كلمتنى عيونى

عن كلام فى لسانك انت .... قبل ما يتقال عرفتو
عن امانى جميلة زيك.... عن امل جواى عشتو

عن فرح يجمعنا باكر... فى حلم من بدرى شفتو
الالما تقول تصارحي... تهربا الكلمات تخونك
انت ماقتلى ... كلمتنى عيونى
عن سعادة العمر كلو... تحتوينى معاك اشوفا
عن محبه طويلة بينا ... العمر ماعشنا خوفا

ماكلام روعة عيونك... حلوة كلماتو حروفا
برضى بيك أنا لسة هايم... مابحس فرحة دونك
انت ماقتلى ... كلمتنى عيووووووونك

كلمات وألحان المعز فتح الرحمن
قســــــــــــــــــــــــــــــــــــوه

مش حرام يا غاليه تقسى ...
لوفاى واخلاصى تنسى ....


حرام ..... حرام ..... حرااااااااااااااام



ياما عشت معاك آلم ....
بسمات مزيفه من وهم
مشيت طريق حبك كفيف
.... كل خوفى ارجع منهزم

ليه هان عليك تجرحينى
.... تملى كل حياتى هم
حرام ... حرام ... حراااااااااااااااااااااام



لو بتدرى يا حياتى
..... حياتى من غيرك عدم
اسرفت فى حبك عشان
.... عشت فى دنياك حكم

انا ياما اهديتك مشاعر
..... صادقه زاهيه حروف نغم
وهبت قلبك كل غناى
.... لكنوا قلبك لى ظلم......
لكنو قلبك لي ما رحم
أنو قلبك لي ظلم




احلى ســـــــــــــــــــــــــــــنين

رغم احساسى بى بعدك ...هناك فى الغربه شلت حنين
رغم الكان قبل القاك ...مشيت فى هواك احلى سنين
احلــــــــــــــــــى ســــــــــــــــــــــنين



صوتك نغمه فى جواى ...تزيد احساسى بالبهجه
اشيل اوراقى واكتب ليك ...حروف بالريده مبتهجه

نقول ياحلوه مشتاقين ...دوام فى بالى والمهجه
لو انساك يضيع عمرى ...تروح افكارى واللهجه



جيتك مره فى الخاطر ....سالتك بى فرح دفاق
لقيتك انتى اجمل زول ... لقيتك انتى اروع زول
تلوحى بى قليب خفاق ... تلوحى بى قليب خفاق

تطل البسمه من عينيك ... تملى قليبى بالاشواق
لانك انتى ست الكل ... نبع الريده والاشواق

لانـــــــــــــــــــك انتــــــــــــــــــى ســـــــــت الكل
نبع الريــــــــــــــــــــــــــــــده والاشـــــــــــــــواق



سامع صمتك
سامع صمتك سامع صمتك..
لما بخلت علي كلمتك ..
أستكترت الكلمة علينا..
لو ما بريدك ما لومتك
*************
أنا طولت وحشني كلامك
ليه حرمت علي أحلامك
ما بتطاول وما بتنازل
خوفي عليك الرادك لامك



لا جافيتك ولا خاصتمك
ياما قريتك وياما حلمتك
كل الدنيا وناسا في كفة
وانت في كفة وأنا قيمتك

عصفوين لامهم غنية
كل عصفور للتاني الدنيا
لا هددنا زوابع عابرة
ولايوم سكتت في العنية
ما هددنا زوبع عابرة
ولا يوم سكنت فينا الغنية
ولا هددنا زوابع عابرة
ولايوم سكتت فينا الغنيااااا

29 / البوم يا زول يا طيب

صحوة الذكرى

يا صحوة الذكرى المنسية
من بعدك وين الحنية
بتعدّي مواسم وتروّح
والذكرى بتصبح أبدية
أبديييياااااااااااااااااااااااا


يا مرسى الفرحة يا واحة
قبلة عيني وصباحا
من بعدك غنيا بتشجيني
وخطايا بعدك تواها
الحزن الخيّم في قلبي
وأيامي الفاتت أفراحا
يا لابس الفرحة يا واحة
قبلة عيني وأفرحا
من بعدك غنيا بتشجيني
وخطايا بعدك تواها
الحزن الخيّم في قلبي
وأيامي الفاتت أفراحا
لا فرحة بدونك بتدوم
لا قلبي وراك لقى الراحة


عصفورنا الروّح كلمتو
وصيتو يكوس يسأل عنك
في جنب جناحو سطرتو
بحناني الفايح منك
في أي مكان لو قابلتو
أنا شوق الدنيا علي منك

بتعدّي مواسم وتروّح
وبتجيني أظنك وما أظنك
يا صحو الذكرى المنسية
من بعدك وين الحنية
بتعدّي مواسم وتروّح
والفرقة بتصبح أبدية
أبديييياااااااااااااااااااااااا

الرحلة طويلة
مكتوبة عليّ وبمشيها
المسافة بعيدة
ومحسوبة خطاوي وجاييها
الغنية حزينة
مليانة محنة وأغنيها
والذكرى الباقية معاي منك
يا ريتو قلبك يصحيها




السنين

قالو لي انساهو وامسح من خيالك ذكرياتو
انسى كل الماضي وابعد عن طريقو وعن حياتو
فات وخلاك للزمن ضاعت امالك سدن
ليه تحن من تاني ليه ليه تفكر في صلاتو

السنين العشت فيها معاك هنايا
اقوى من قول العوازل واسمى من كلمة وشاية
لو خلاص قلبك نسى الايام معايا
برضي راضي في الغرام كم من ضحايا
بس تأكد يا حبيبي انو حبك في دمايا

بالامل صبرت قلبي وعشت في دنيا الاماني
اهدهد الشوق بين ضلوعي واترجم الالام اغاني
اروي للناس سر عذابي واحكي ليهم اشجاني
لا نفع دمعي السكبتو ولا شفع عندك حناني

الغريب عن وطنو مهما طال غيابو
مصيرو يرجع تاني لاهلو وصحابو
ينسى الامو وشجونو ينسى حرمانو وعذابو
الا قلبي يا حبيبي في هواك طال اغترابو

بعد ريدك

بعد ريدك بدت تتبسم الأيام
بسمه بشوفها في عيونك
وفي ومضة ثغرك البسام

زمان يالسمحة قبال يبقى بينا كلام
كان الشوق بيتأجج ويشعل جوه قلبي ضرام
كنت أتمنى ألقاكي وأحييك ردي ليّ سلام
عشان إيديّا تتنسم عبير إيديك
وعشان عينيّا تقابل بالفرح عينيك

وساعة اللقيا قبال ما أصل ليكي
سبقني الشوق بي لهفة شان يلاقيكي
وقلبي صبح فراشة وطار يهفهف من حواليكي
يناجيكي ويقول ليكي يغازل في خطاويكي

بعد ريدك على وتر الأمل غنيت
موسقت الحروف ألحان غنا ودوبيت
صدحت فرحت ومن فرط السعادة بكيت
بدت تتبسم الأيام وكتين يا فرح طليت

يازول ياطيب

مانحن الفينا مكفينا مالك داير تتعبنا معاك
لا بنقدر انحنا على الهجران لا بنرضى كمان زعلك وجفاك

وما تصدق إنت كلام الناس في سيرتك ديل ختو وشالو
لا عرفو يقابلوك بالأفراح لا قالو نريح يوم بالو
أنسى الجافوك وما تسأل عن ليل الصبر وموالو
وما تفكر أبدا في الينساك وسيبك من قلنا ومن فالو

والاّهة تسوقك لي اّهة في سكة عجيبة وتوّاهة
محتارة وحاتك ليها زمان يا شوق العمر الجمعنا
كدي حاول شوفنا وأسمعنا رسّينا معاك على بر أمان
يازول يا طيب للاّخر وما بتعب جد ياناس غير الشاطر
وما بعرف يوم طعم الأحزان


يا بنية

بنية هيي أرح بلدنا نمشي الجبال ...
بينة هييييييييييييييييييييييييي
أتزكري ايام زمان وقت الرشاح
نطلع بعيد بر الفريق
نلعب سو نمرح سوا
نزرع سوا نحصد سوا
ساعة العصيم نرجع سوا
نلقى الفريق طربان هناك
صوت الكرن جايبو الهوا
بنية هوييييي ....
هيييييييييييييييييييييييي
بنية هييييييييييييييييييييييييييييي
أتذكري بيتنا الكبير في قعر الحجر
وزنن جميل يا الساكنة في ضي القمر
بنية هييييييييييييييييييييييييييييييييي

بنية هيييي أرح بلدنا نمشي الجبال
أرح بلدنا نمشي الجبال
أوه اوه أوه أوه ه ه ه



حكايتي معاك

حكايتي معاك ياصيدة حكاية زول آبى الريده
تصوني هواه في ألاول يعاند فيك زمن طول
وتاني يميل ويتحول وتاني يميل ويتحول ....

خلاص حنكمل الريدة وتبقى حياتنا تغريدة
معاك الدنيا بنريدا مفرهدة وزاهية في عيدا..

بريدك و أنتي في بالي بقيت سارح ده ما حالي
منو الغيرك بيحلالي خلاص غيرتي أحوالي

متين تتحقق الغاية ونبقى دوام بلا نهاية
جميلة وفي الحسن أية بريدك وريدي ما كفاية

حكايتي معاك ياصيدة ...
وتاني وتاني تانييييي بتحووووووول




موعودة

في الريدة انتي معاي موعودة بي الافراح
ست الفريق ام زوم عابق عبيرك فاح
وشك قمر والطيب على خصلتك يرتاح

***********
عينيك ينبوعين بالفرحة والاحساس
عليك خدود ناضرات قوام رشيق مياس
ما فيكي اي كلام من القدم للراس
حسنك دا لاسمعوا لا شافو زيو الناس

*******
فوق لي جمال حسنك ادوك جمال الروح
الطيب مسك سيرتك يرويها وين ما يروح
القمرة من تطلع بي ريدا ليكي تبوح
القالوا ليك ممنوع بس انتي ليك مسموح

*********
بستحلى جرحك لي واغرب شئ فيك كيي
لما الطريق ضـــلم نورتو بي ضييك
مكتوبة ليك ريدة مع زول يكون زيي
ياريدة ياريدة مع زول يكون زيي
ما تعرفي غي في الريد لمن يجييك ريي

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
البومات الحوت 4
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى تومكو :: الفئة الأولى :: المنتدى الأول-
انتقل الى: